Fyrirtækið Melar Sport var stofnað um mitt ár 2009 utan um rekstur Viðars Halldórssonar íþróttafélagsfræðings og Magnúsar Agnars Magnússonar umboðsmanns.
Starfsemi fyrirtækisins skiptist annars vegar í ráðgjafaþjónustu og hins vegar í umboðsskrifstofu fyrir íþróttafólk. Ráðgjafahlutinn býður upp á víðtæka þjónustu fyrir íþróttasamfélagið. Ráðgjöfin styður einnig við afreksfólkið sem er á skrá hjá umboðsskrifstofunni en sækir jafnframt þekkingu í þennan afreksheim íþrótta og miðlar þeirri þekkingu til annarra viðskiptavina. Umboðsskrifstofan þjónustar metnaðarfullt íþróttafólk.
Nafn fyrirtækisins og hugmyndafræði eiga sér rætur í glæstri íþróttasögu Íslendinga. Það er dregið af Melunum í Reykjavík sem voru vagga íslensks íþróttalífs í flestum íþróttum í hátt í heila öld á uppvaxtarárum íþróttahreyfingarinnar á Íslandi.
Fyrsti manngerði íþróttavöllur á Íslandi, Glímuvöllurinn á Melunum, var reistur árið 1873 og síðar Melavöllurinn árið 1911 sem stóð til ársins 1984 þó með einhverjum breytingum. Við vígsluathöfn Melavallarins árið 1911 sagði Ólafur Björnsson, formaður íþróttasambands Reykjavíkur m.a. um völlinn:
Hann er einn votturinn um það, að hjá oss er að fæðast af nýju endurfrjóvgaður hollur tíðarandi, heilbrigðar skoðanir um það, sem fornmenn töldu mest um vert og lýsir sér í rómverska máltækinu: Sana mens in sano corpore (heilbrigð sál í hraustum líkama).
Á sínum tíma þótti Melavöllurinn vera einn sá besti sinnar tegundar á Norðurlöndum og voru mörg af merkustu íþróttaafrekum Íslendinga unnin á vellinum. Á Melunum og Melavellinum voru stundaðar fjölbreyttar íþróttir eins og knattspyrna, frjálsar íþróttir, hnefaleikar, glíma, fimleikar, hestamennska, handknattleikur, tennis, badminton, íshokkí, skautahlaup, o.fl. auk þess að þar voru haldin landsmót og ýmsar skemmtanir.
Melar Sport leggja sig fram við að standa fyrir þau heiðvirðu og árangursríku grunngildi íþrótta fyrri tíma sem lúta að vinnusemi, heiðarleika og virðingu í leið að árangri. Í því felst að fyrirtækið leitast við að veita viðskiptavinum sínum persónulega og vandaða þjónustu sem snýr að þörfum hvers og eins.
Viðar Halldórsson
(vidar@melarsport.is)
Magnús Agnar Magnússon
(magnus@melarsport.is)
